Menu Xerais

Marilar Aleixandre: «A Real Academia Galega ten que ter un papel fundamental na defensa da lingua»

A escritora Marilar Aleixandre ingresou esta fin de semana na Real Academia Galega. Reproducimos unha anotación de Manuel Bragado en Brétemas e unha entrevista que lle fixo Ana Romaní á autora no Diario Cultural da Radio Galega.

 

 

Marilar termando da paisaxe galega

Foi moi emocionante para nós a cerimonia de ingreso de Marilar Aleixandre na Real Academia Galega. O texto do seu discurso, Voces termando da paisaxe galega, é unha síntese das preocupacións e da ollada da escritora e científica nacida galega en Vigo, na primavera dos caraveis.

Foi o seu un texto para a acción, no que Marilar propuxo unha estratexia de resistencia activa confiada ao valor das palabras, abrazada ao abruñeiro que como a lingua galega resiste nas rúas. Un discurso poético con fonda carga científica que reivindica o papel das mulleres na creación literaria e no valor do feminismo que cuestiona a idelizaciónda paisaxe. Un texto para a esperanza, no que se confía nos programas de educación ambiental dos centros educativos, mais que tamén asume a corresponsabilidade individual e colectiva na defensa de cada unha das paisaxes, tamén as humanas, as da memoria, as esquecidas e agochadas. En definitiva, unha peza memorable que merece unha lectura demorada.

Como tamén merece lerse devagariño a resposta de Fina Casalderrey que retratou de forma moi certeira a esta ovella descarreirada que “decotío sacou os pés do prato”, a “exploradora e aventureira para a que os mapas son material altamente subversivo”.

Beizóns para Marilar por semellante discurso que orgulla a todos os que compartimos con ela afectos dende hai case catro décadas.

Manuel Bragado

 

Marilar Aleixandre: «A Real Academia Galega ten que ter un papel fundamental na defensa da lingua

A entrevista de Ana Romaní a Marilar Aleixandre no Diario Cultural da Radio Galega pode escoitarse nesta ligazón.

 

Comentarios pechados