Menu Xerais

Xurxo Souto: «O mar forma parte dese noso patrimonio que ninguén nos conta e dá historias moi fermosas». Entrevista en Radiofusión

Radiofusión emitiu unha entrevista con Xurxo Souto sobre o seu libro Contos do mar de Irlanda. A entrevista en audio pode escoitarse neste enlace.

 

Xurxo Souto: «Quixen atopar unha parte de nós mesmos que navega polos mares do norte»

Con tanto mar como temos, é posible que vivamos de costas a el? É. “Non é un problema individual, é un problema estrutural: vivimos no Estado de Europa no que temos a capital máis lonxe da ribeira. Madrid está moi lonxe… Até Viena, un país central, está máis preto do mar”, reflexiona Xurxo Souto. Ao autor coruñés non lle foi preciso embarcar para o Gran Sol (“non tiña corpiño para iso”, chancea), para fascinarse con esa parte do noso país que é flotante, que viaxa nos barcos desafiando o mar. “Na vida social, na vida oficial, o mar non existe”, engade, até o punto de que agora “en todas as cidades as portas do porto están pechadas”. Por iso Souto quixo “abrir a orella ao mar” e comezou a preguntarlle aos mariñeiros por todo aquilo que non lle explicaban nas aulas, nos medios de comunicación. Así foi como puido “atopar unha parte de nós mesmos que navega polos mares do norte”. Ese achado conforma as historias de “Contos do mar de Irlanda”, un volume editado por Xerais, e a obra de ficción máis vendida das letras galegas nos últimos meses e que este serán ofrece ao océano na Coruña.

Cultura • 08/10/2014 • Autor: Redacción

Nas Portas Ártabras, no outeiro da Cidade Vella, a carón da ábsida da Igrexa de Santa María, cuxo campanario serviu durante séculos de referencia para todos os mareantes que se achegaban ao porto herculino, Xurxo Souto presentará ás 20 horas o seu novo libro. Canda el estarán outros veciños egrexios da cidade como Manuel Rivas e Felipe Senén. “Haberá gaiteiros, cornas e acordeón”, promete o convite, o primeiro dunha serie nomeada “Da Gaiteira a Monte-Alto. A viaxe ao Gran Sol, sen saír da Coruña”, que se desenvolverá nas vindeiras semanas en diferentes puntos da capital provincial, mentres Souto segue levando os contos por toda a xeografía do país.

 

 

 

Comentarios pechados